എന്നോ നിലച്ച്‌ പോയൊരു ക്ലോക്ക്‌
ന്യൂ ഇയറിനെ നോക്കി കണ്ണു മിഴിക്കുന്നു..

ഒറ്റയായിരിക്കുന്നതിൽ നീ ഒറ്റക്കല്ലെന്ന്
കണ്ണു ചിമ്മുന്നാകാശത്തൊരൊറ്റ നക്ഷത്രം

അടപ്പ്‌

ഈ കൊലപാതകത്തിലോ, ഗൂഡാലോചനയിലോ പങ്കില്ല
സാഹചര്യത്തിന്റെ സമ്മർദ്ദം-
മൂലം മൂടി വെക്കേണ്ടി വന്നു..

വെട്ടി വെള്ളത്തിലിട്ടു
പുഴുങ്ങിയ കേസിലെ
പ്രതി അടപ്പ്‌

നിന്റെ കണ്ണുകളെക്കുറിച്ച്‌

നക്ഷത്രമാലകൾ തിളങ്ങുമാകാശത്തിനിരുൾ ചൂഴും നിന്റെ കണ്ണുകൾ,
തിരമാലകളാലിലകളിൽ തീർക്കും കാറ്റിന്റെ ആഴങ്ങൾ നിൻ കണ്ണുകൾ,
അകലുവാനിനിയുള്ള ദൂരങ്ങൾ നദിയായ്‌ നീളുമീ ഉറവുകൾ നിന്റെ കണ്ണുകൾ..

എന്റെ സ്വപ്നങ്ങളിൽ പെയ്തു വീഴുമീ കൊള്ളി മീനുകൾ....

ആ കൊയ്ത വയലൊന്നും നമ്മുടേതായിരുന്നില്ല,
ആ പാടിയ പാട്ടും..

ഇരുളിൽ വിടാതെ പിന്തുടരുന്ന
പന്തങ്ങളിൽ നിന്ന് രക്ഷ നേടാൻ
എന്തു ചെയ്യണം..??

ഒന്നുകിൽ കൂടുതൽ ഇരുളാകുക,  അല്ലെങ്കിൽ കൊടും തീയാകുക..

നക്ഷത്രങ്ങൾ പെയ്തിറങ്ങുന്ന കിനാവിൽ
നിന്നിറങ്ങി നാം നനഞ്ഞതെത്ര തീമഴകൾ..