നീ നിന്റെ മിഴികളാൽ എന്റെ
ഹൃദയത്തിനകത്തേക്ക്  നോക്കുന്നു
നിന്റെ മെലിഞ്ഞു നീണ്ട വിരലുകൾ
എന്റെ കിനാവിനുള്ളിൽ പരതി
ഏറ്റവും മനോഹരമായ ഒന്ന്
എന്നും എനിക്ക് സമ്മാനിക്കുന്നു...
പുലരിയിൽ, നനുത്ത പുഷ്പമായ്
പുഞ്ചിരി തൂകുന്നു, സന്ധ്യയിൽ
ചുവന്ന മുഖത്തോടെ
യാത്ര ചോദിക്കുന്നു...
ഏകാന്തതയുടെ കടൽ പാലത്തിലൂടെ
അവസാനത്തിലേക്ക് നടന്നു നീങ്ങിയ
എന്നെ കരയിൽ ഇരുന്നൊരു മത്സ്യ-
കന്യകയായ്‌ പാട്ടു മൂളി നീ തിരികെ വിളിച്ചു,
നേർത്ത മുഖാവരണം മാറ്റി നീ
നിന്റെ കണ്ണിന്റെ ആഴത്തിലേക്ക്
മാടി വിളിച്ചു,  ഇനിയും ഞാൻ
പാതി വഴിയിലാണ് ....
എങ്കിലുമൊരു നാൾ കാറ്റും തിരകളും താണ്ടി
നിൻ ഹൃദയത്തിലെ ചുഴിയിൽ
ഒരു കൊടുങ്കാറ്റായ്  പടരും ഞാൻ...