എന്റെ ഹൃദയരക്തം മുഴുവനും വാർന്നു
നിന്റെ നെറ്റിയിൽ, കുങ്കുമപൊട്ടിൽ
കണ്ണാടി നോക്കുന്നു.. നിന്റെ കണ്ണിലെരിയുന്ന
കാട്ടുതീ കരിയിച്ച പുൽനാമ്പുകളോ
കണ്പീലികൾ ? ഇരുളിന്റെ കീറെടുത്ത്
മഴവില്ലാക്കിയതോ പുരികക്കൊടികൾ ?
മുടിയിഴകൾ തിരകളായ് എത്തി നോക്കും
കാളിന്ദി തൻ മണൽപരപ്പ് കവിൾത്തടം..
ഒരു പുഞ്ചിരിയിൽ ലോകത്തിലെ മുഴുവൻ
താരകളെയും വലിച്ചെടുക്കും തമോ-
ഗർത്തങ്ങൾ നുണക്കുഴികൾ...
നിന്റെ മാലയിൽ കൊരുത്ത മുത്തു പോലെ
കടലിലേക്കിറങ്ങാൻ ഭയന്നു കെട്ടിയിട്ട
വള്ളമിന്നെന്റെ മനസ്സ്......